Le miracle de la Saint Vincent

Le miracle de Saint Vincent (patois d'Andilly - 54 - Toulois)
d’après une nouvelle d’Émile Moselly



        Dos l’tops, los vignes d’Chaud’nèy ètint r’noummées; l’vin du Groûs-Ècât, d’lè Maix-Frondâye, d’lè Font’notte coulôt coumme du v’loûs sus l’estoumac. Auj’d’(h)oy, on n’y voit pleus qu’dos peummes de terre et dos leuzernes.
        L’22 janvî ètôt lè fête dos vignerons; èprès lè mosse, on poutôt en procession l’saint Vincent chez l’çaw qu’avôt d’nné lè pleus belle offrande; il y restôt toute l’ennêye.
        En septante-six, ç’atôt l’père Lexis que d’vôt èwi l’saint. Ç’n’atôt-m’ in (h)oumme d’èglîse; quand i s’mottôt en colère, i f’yôt tout trembier chèyz lu mâs i f’sôt pertîe d’lè confrèrîe et i pèyôt sè cotisâtion.
        L’saint avôt èté mins pa lè Gènîe, sa fômme dos lè chambe de derri sus lè crèdence. Le Lèxis n’y v’nôt-m’ s’vot, mâs quand’l y allôt i r’wâtôt l’saint d’trèvâs en d’jant:
        - Fâs ettention ! merche drôt ! fâs bîn t’mètier d’saint ! ou bin... !
        Tertot ellè bin jeusque fin èvrel; los vignes èvint du boûs, los râjins ètint d’jè bîn formès. Mâs, vol qu’în sô, l’vent d’Taw s’atôt mins è souffier et dos lè noyt, los vignes basses feurent ogeolées.
        L’père Lèxis ellè dos lè chambe, tounant l’saint du coté de s’meix, li d’jè en li montrant le poing:
        - R’wâte teun’ ouvrêge, prope à rien ! vol ç’que t’es laissé fâre ! .
        Ça n’allè-m’ plus lon, i n’èvôt-m’ trop d’mau, l’lend’main, i n’y pensôt plus. Mâs on dotôt toujous los saints d’glace qu’n’atôt-m’ pessés, et on n’dotôt-m’ pou rin !
        L’jou d’lè fête è Chaud’nèy, l’proumèy dimoche de mai, ç’feut bin pays; l’mètin y èvât d’lè glèce sus lo tôt; los broches ètint tout nôres jusqu’au grôs bout. L’Lèxis qu’n’avôt-m’ droumèy, alla fâre în tou auss’toût l’jou: i peût vôr qu’lè vodoge ètôt d’jà fâte. Sans rin dère, i vè quèri i paiché dos lè bougerie et rosse l’saint dont los ècailles en piâtre volont dos lè chambe.
        Lè Gènîe qu’atôt co on layt, s’hâte de s’epproter, rèmesse los mourceaux dos s’tabier, un brès per ci, eune jambe pa lè et s’o fut en bâillant lo pouter è Monseur Keuré qu’lo r’collè coumme i p’vè.
        D’pos l’tops-lè, l’saint n’vâ pus dos los mâjons; èprès lè procession, on le r’poute è l’èglîse où i n’è pus è crainde lè colère du manre Lèxis ou dos peutes geos coumme lu.

                            Léopold Bouchot
                            Le Pays Lorrain, 1927 (page 478)